நன்றி:தினமணி
சென்னையில் வருகிற பிப்ரவரி 21-ஆம் தேதி முதல் கோரிக்கைகளை வலியுறுத்தி, ஜாக்டோ - ஜியோ சார்பில் நடைபெறும் தொடர் மறியலில் தமிழ்நாடு தொடக்கப் பள்ளி ஆசிரியர் மன்றத்தினர் பங்கேற்க உள்ளதாக அதன் பொதுச் செயலர் க.மீனாட்சிசுந்தரம் தெரிவித்தார்.
இதுதொடர்பாக சிதம்பரத்தில் சனிக்கிழமை செய்தியாளர்களுக்கு அவர் அளித்த பேட்டி:
1.பங்கேற்பு ஓய்வூதியத் திட்டத்தை ரத்து செய்து, பழைய ஒய்வூதியத் திட்டத்தை அமல்படுத்துதல்,
2.இடைநிலை, முதுநிலை ஆசிரியர்கள், அரசுப் பணியாளர்கள் 50 பிரிவினர்களுக்கும் உள்ள ஊதிய முரண்பாடுகளைக் களைந்து, மத்தியஅரசுக்கு இணையான ஊதியத்தை வழங்குதல்,
3.சத்துணவுப் பணியாளர்கள், அங்கன்வாடி பணியாளர்கள், பகுதி நேர ஆசிரியர்கள் உள்ளிட்டோருக்கு அளிக்கப்பட்டு வரும் தொகுப்பூதியத்தை காலமுறை ஊதியமாக மாற்றி, பணியை நிரந்தரம் செய்தல்,
4.விடுபட்ட 21 மாதங்களுக்கு ஊதிய நிலுவைத் தொகையை வழங்க வேண்டும்...
ஆகிய 4 அம்சக் கோரிக்கைகளை வலியுறுத்தி, சென்னையில் ஜாக்டோ - ஜியோ சார்பில் வருகிற பிப்ரவரி 21-ஆம் தேதி முதல் நடைபெறும் தொடர் மறியலில் தொடக்கப் பள்ளி ஆசிரியர் மன்றத்தினர் 5 ஆயிரம் பேர் பங்கேற்க உள்ளனர். மேலும், போராட்டம் தொடர்பாக சென்னையில் நடைபெறவுள்ள ஒருங்கிணைப்புக் கூட்டத்தில் போராட்டத்தைத் தீவிரப்படுத்துவது குறித்தும் முடிவு எடுக்கப்பட்டுள்ளதாக
க.மீனாட்சிசுந்தரம் தெரிவித்தார்.
முன்னதாக, தமிழ்நாடு தொடக்கப் பள்ளி ஆசிரியர் மன்றத்தின் மாவட்டச் செயலர்கள் ஆலோசனைக் கூட்டம் நடைபெற்றது. இதில், அமைப்பின் மாநிலத் தலைவர் லா.தியோடர் ராபின்சன் தலைமை வகித்தார். கடலூர் மாவட்டச் செயலர் தி.சண்முகம் வரவேற்றார். மாநிலத் துணைத் தலைவர் ம.வரதராஜன் அறிக்கை வாசித்தார்.
கூட்டத்தில் அனைத்து மாவட்டச் செயலர்கள், நிர்வாகிகள் பங்கேற்றுப் பேசினர். மாநிலத் துணைத் தலைவர் ம.இளமதி நன்றி கூறினார்.
கருத்துகள் இல்லை:
கருத்துரையிடுக